తమన్ మాట మీద నిలబడ్డ వ్యక్తి అని అన్నారు అల్లు అర్జున్ . బన్నీ కథానాయకుడిగా త్రివిక్రమ్ దర్శకత్వంలో వచ్చిన ‘అల వైకుంఠపురములో’ చిత్రం భారీ విజయాన్ని సొంతం చేసుకుంది. ఈ సినిమా విజయంలో తమన్ సంగీతం కీలకమైన పాత్రను పోషించింది. ఈ సినిమాలోని పాటలు వ్యూస్ పరంగా యూ ట్యూబ్ లో కొత్త రికార్డులను సృష్టించాయి.
ప్రస్తుతం ఈ సినిమా ఆల్బమ్‌ 1.13 బిలియన్ వ్యూస్‌తో దూసుకెళ్తోంది. ఈ నేపథ్యంలో చిత్ర సంగీత దర్శకుడు తమన్‌ను ప్రశంసిస్తూ బన్నీ తాజాగా ఓ ట్వీట్ పెట్టారు. ‘మై డియర్‌ తమన్. నీ మాటను నువ్వు నిలబెట్టుకున్నందుకు నేనెంతో గర్వపడుతున్నాను. ‘అల..వైకుంఠపురములో..’ సినిమా ప్రారంభానికి ముందు.. బిలియన్ వ్యూస్ ఉండేలా నాకు ఆల్బమ్‌ కావాలని నీతో చెప్పాను. దానికి నువ్వు.. ‘సరే బ్రదర్‌. నేను ప్రామిస్ చేస్తున్నా’ అని అన్నావు. ఈరోజు 1.13 బిలియన్ మంది ‘అల..వైకుంఠపురములో..’ ఆల్బమ్‌ను చూశారు. ధన్యవాదాలు. మాట మీద నిలబడే వ్యక్తి’ అని బన్నీ ట్వీట్ చేశారు.