లాక్ డౌన్ తర్వాత టాలీవుడ్ క్రాక్ తో బోణీ చేసింది. ప్రేక్షకులని మళ్ళీ థియేటర్ లోకి తెచ్చింది. ఈ సినిమా మళ్ళీ పరిశ్రమకి ధైర్యం ఇచ్చింది. ఈ సినిమా తర్వాత మళ్ళీ కొంత గ్యాప్. సరైన సినిమా పడలేదు. ఐతే ఉప్పెనతో మళ్ళీ జోష్ వచ్చింది. ఈ సినిమా ప్రస్తుతం బాక్సాఫీసు వద్దే సందడి చేస్తుంది. ఇక గత వారం విడుదలైన నాంది సినిమా కూడా జోరు మీద వుంది.
ఈ వారం కూడా ఆరు సినిమాలు వరస కడుతున్నాయి. ఐతే ఇందులో నితిన్ చెక్ ఒక్కటే క్రేజ్ వున్న సినిమా. చెక్ తో పాటు అక్షర, అంగుళీక, క్షణం క్షణం, నువ్విలా నువ్విలా, ఎం.ఎం.ఓ.ఎఫ్ చిత్రాలు విడుద‌ల‌కు సిద్ధమ‌య్యాయి. నితిన్ `చెక్`పై అంద‌రి గురీ ఉంది. చంద్రశేఖ‌ర్ ఏలేటి ద‌ర్శక‌త్వం వ‌హించిన చిత్రమిది. ట్రైల‌ర్ ఆక‌ట్టుకుంది. సినిమాపై అంచ‌నాలు పెంచుతోంది. చంద్రశేఖ‌ర్ ఏలేటి సినిమాలంటే ఓ వ‌ర్గం ఎప్పటికీ ఆస‌క్తి చూపిస్తుంటుంది. నితిన్ మంచి ఫామ్ లో ఉన్నాడు. కాబ‌ట్టి.. ఈ సినిమాకి మంచి ఓపెనింగ్స్ ల‌భించే అవ‌కాశం పుష్కలంగా ఉంది. ఉప్పెన, నాంది తప్పితే ఈ వారం విడుదల అయ్యే సినిమాలతో నితిన్ కి పెద్దగా పోటీ లేదనే చెప్పాలి.
