యంగ్‌ టైగర్‌ ఎన్టీఆర్‌ ప్రస్తుతం బాబీ దర్శకత్వంలో కళ్యాణ్‌ రామ్‌ నిర్మిస్తున్న ‘జై లవ కుశ’ చిత్రంలో నటిస్తున్నాడు. ఈ చిత్ర షూటింగ్‌ మొదలయిన కొంత కాలానికే టైటిల్‌తో ఉండే ఒక పోస్టర్‌ను విడుదల చేసి నందమూరి అభిమానులను ఉర్రూతలూగించారు. ఆ పోస్టర్‌ను చూసి యమ ఖుషీ అయిన ఎన్టీఆర్‌ అభిమానులు ఈ చిత్రంపై చాలా ఆసక్తిగా ఉన్నారు. ఇప్పటి వరకు లేని విధంగా ఎన్టీఆర్‌ ఈ చిత్రంలో మూడు పాత్రలలో నటిస్తున్నాడు. ధృఢమైన కథతో తెరకెక్కే ఈ చిత్రంపై సినీ ప్రముఖులు కూడా ఆసక్తిని కనబర్చుతున్నారు. ఈ చిత్రంలో రాశిఖన్నా, నివేధా థామస్‌లు హీరోయిన్‌గా ఎంపికయ్యారు.
ఈ చిత్ర ఫస్ట్‌లుక్‌ ఎప్పుడు వస్తుందా అని అభిమానులు ఆసక్తిగా చూస్తుండగా త్వరలోనే రిలీజ్‌ చేయాలని చిత్ర యూనిట్‌ భావిస్తోంది. మే 20న ఎన్టీఆర్‌ పుట్టిన రోజు కావడంతో అదే రోజున ఫస్ట్‌లుక్‌ను విడుదల చేసే ఆలోచన చేస్తున్నారు. అభిమానులు కూడా పుట్టిన రోజు కానుకగా ఏదో ఉంటుందని ముందు నుండే అంచనా వేశారు. వారు అనుకున్నట్టే ఫస్ట్‌లుక్‌ ఎన్టీఆర్‌ బర్త్‌ డే కానుకగా రాబోతుంది. అయితే ఈ ఫస్ట్‌లుక్‌లో ఎన్టీఆర్‌ ఒక్క పాత్ర మాత్రమే కనిపిస్తుందా మూడు పాత్రల గెటప్‌లు కనిపిస్తాయా..?? అని అభిమానుల కొత్త సందేహం. అది నివృత్తి కావాలంటే ఫస్ట్‌లుక్‌ విడుదలయ్యేదాకా ఎదురు చూడాల్సిందే మరి.
