కాంగ్రెస్ అవినీతి, కుట్ర రాజకీయాలపై తెదేపా ప్రజాగర్జన సభలను నిర్వహిస్తున్న విషయం తెలిసిందే. ఆదివారం తిరుపతిలో నిర్వహించిన సభకు ప్రజల నుంచి బ్రహ్మాండమైన స్పందన వచ్చిందని తెలుగు తముళ్లు తెగ ఖుషి అవుతున్నారు. ఇది జనంలో వస్తున్న మార్పునకు, చైతన్యానికి నిదర్శనమని ఆ పార్టీ నేతలు అంటున్నారు. అంతేకాకుండా.. తిరుపతి సభలో తెదేపా అధినేత చంద్రబాబు కాంగ్రెస్ ప్రభుత్వాన్ని చీల్చిచెండాడిన తీరు పలువురిని ఆకర్శించిందని చెప్పుకొంటున్నారు. ఈ ఉత్సాహంతోనే.. తెదేపా శ్రేణులు మరో ప్రజాగర్జనకు సిద్దమవుతున్నారు. ఈరోజు (సోమవారం) ఒంగోలులో మరో ’ప్రజాగర్జన సభ’ జరగనుంది. ఒంగోలులోని మినీ స్టేడియంలో మధ్యాహ్నం రెండు గంటల నుండి సభ ప్రారంభం కానుంది. ఇప్పటికే ఈ సభకు అన్ని ఏర్పాట్లు పూర్తయ్యాయని ఓంగోలు తెదేపా నేతలు చెబుతున్నారు.
