ముంబయ్‌లో జరిగిన పుష్ప 2: ది రూల్ ప్రెస్‌మీట్‌లో ఐకాన్‌ స్టార్‌ అల్లు అర్జున్ చిత్ర యూనిట్ కి , ముఖ్యంగా దర్శకుడు సుకుమార్‌కు ప్రత్యేక కృతజ్ఞతలు తెలిపారు. తనను స్టార్‌గా తీర్చిదిద్దింది సుకుమారే అని, తన కెరీర్‌లో ఆయన పాత్ర ఎనలేనిదని చెప్పారు. సుకుమార్ ప్రతిభను కొనియాడుతూ, ఆయన విజన్‌తో ఈ చిత్రం మరింత ప్రత్యేకంగా నిలుస్తుందని అన్నారు. అల్లు అర్జున్ తమ యూనిట్ లోని ప్రతి ఒక్కరికి, ముఖ్యంగా సంగీత దర్శకుడు దేవి శ్రీ ప్రసాద్‌కు ధన్యవాదాలు తెలిపారు. ఆయనతో కలిసి ఎన్నో సూపర్‌హిట్‌ పాటలు చేశానని, పుష్ప 2 నుంచి రాబోయే పాట గురించి చాలా ఆసక్తిగా ఎదురుచూస్తున్నానని చెప్పారు. తన సహనటి రష్మిక మందన్న గురించి మాట్లాడుతూ, గత నాలుగేళ్లుగా ఆమెతో కలిసి పనిచేయడం ఎంతో ఉత్సాహాన్ని కలిగించిందని, ఆమె ఒక పాజిటివ్‌ ఎనర్జీ ఉన్న వ్యక్తి అని కొనియాడారు.
రష్మిక మాట్లాడుతూ, పుష్ప చిత్రాల్లో ఆమె ప్రయాణం ఎమోషనల్‌గా సాగిందని, మొదట అల్లు అర్జున్‌తో కలిసి పనిచేయడం పెద్ద అవకాశం అని అనిపించిందని చెప్పారు. తనను ఆ కుటుంబ సభ్యులా స్వీకరించారని, సుకుమార్ లాంటి జీనియస్‌ దర్శకుడితో పని చేయడం గర్వంగా అనిపించిందని అన్నారు.
నిర్మాతలు అనిల్‌ తడాని, భూషణ్‌ కుమార్‌ మాట్లాడుతూ, పుష్ప 2కు ఇప్పటివరకు వచ్చిన రెస్పాన్స్‌ అద్భుతమని, ఈ చిత్రం 12,000 స్క్రీన్లకు పైగా ప్రపంచవ్యాప్తంగా విడుదల కాబోతుందని చెప్పారు. సుకుమార్ సహా చిత్ర యూనిట్ అందరూ చాలా కష్టపడి పనిచేశారని, దేవి శ్రీ ప్రసాద్‌ అందించిన సంగీతం, క్యూబా ఫోటోగ్రఫీ ప్రేక్షకులను మైమరిపిస్తాయని పేర్కొన్నారు.
ఎగ్జిబిటర్లు మాట్లాడుతూ, ఈ చిత్రం చిన్న పిల్లల నుంచి వృద్ధుల వరకు అందరూ ఎదురుచూస్తున్న సినిమా అని, అల్లు అర్జున్ స్టైల్‌ మరియు స్వాగ్‌ ఈ సినిమాను బ్లాక్‌బస్టర్‌గా మార్చుతుందని నమ్మకంగా తెలిపారు.
ఈ చిత్రంపై ఉన్న హైప్‌ పుష్ప 2ను భారతీయ చలనచిత్ర రంగంలోనే ఓ సెన్సేషన్‌గా నిలిపేందుకు దోహదపడుతుందని అన్నీ చోట్లా ప్రకటనలు వెల్లువెత్తుతున్నాయి.
