పవర్ స్టార్ పవన్ కళ్యాణ్, తొలిసారిగా పీరియాడికల్ యాక్షన్ డ్రామాలో నటిస్తున్నారు. ‘హరి హర వీర మల్లు పార్ట్-1: స్వార్డ్ వర్సెస్ స్పిరిట్’ పేరుతో రూపొందుతున్న ఈ చిత్రం, ప్రేక్షకులకు మరపురాని థియేట్రికల్ అనుభవాన్ని అందించాలనే లక్ష్యంతో ప్రతిష్ఠాత్మకంగా రూపొందుతోంది. ఈ ఎపిక్ యాక్షన్ డ్రామా, 2025 మార్చి 28న ప్రపంచవ్యాప్తంగా తెలుగు, తమిళం, మలయాళం, హిందీ, కన్నడ భాషల్లో గ్రాండ్ రిలీజ్ కానుంది. హరి హర వీర మల్లు’ పీరియాడికల్ యాక్షన్ సిరీస్‌లో కొత్త అధ్యాయాన్ని తెరవబోతోందనటంలో సందేహం లేదు. పవన్ కళ్యాణ్ అభిమానులు ఈ సినిమాను ఎంతో ఆసక్తిగా ఎదురుచూస్తున్నారు. ఈ చిత్రంలో బాలీవుడ్ నటుడు బాబీ డియోల్ కీలక పాత్ర పోషించగా, నిధి అగర్వాల్ కథానాయికగా నటిస్తున్నారు. అనుపమ్ ఖేర్, నాజర్, రఘుబాబు తదితరులు కూడా ఈ సినిమాలో ప్రధాన పాత్రలు పోషిస్తున్నారు. యువ దర్శకుడు జ్యోతి కృష్ణ, పవన్ కళ్యాణ్ అభిమానుల అంచనాలను దృష్టిలో పెట్టుకుని ఈ చిత్రాన్ని అత్యంత ప్రతిష్ఠాత్మకంగా తెరకెక్కిస్తున్నారు. అద్భుతమైన టీజర్‌తో పాటు, అనేక ఆసక్తికరమైన అప్‌డేట్‌లు విడుదల చేసి సినిమా మీద హైప్‌ను మరింతగా పెంచారు.
ఇటీవల, హాలీవుడ్ దిగ్గజ యాక్షన్ దర్శకుడు నిక్ పావెల్ ఆధ్వర్యంలో ఒక భారీ యుద్ధ సన్నివేశాన్ని చిత్రీకరించారు. పవన్ కళ్యాణ్‌తో పాటు 400-500 మంది పాల్గొన్న ఈ యాక్షన్ సీక్వెన్స్ చిత్రానికి ప్రధాన ఆకర్షణగా నిలవనుంది. ఈ సన్నివేశం అద్భుతంగా వచ్చినందుకు చిత్ర బృందం ఎంతో ఆనందంగా ఉంది. చిత్ర బృందం ఇటీవల ప్రకటించిన ప్రకారం, సినిమా చివరి షెడ్యూల్ ఈ వారాంతంలో విజయవాడలో ప్రారంభం కానుంది. ఇందులో అత్యంత కీలకమైన సన్నివేశాలను చిత్రీకరించనున్నారు. పవన్ కళ్యాణ్‌తో పాటు 200 మంది ఆర్టిస్టులు పాల్గొనబోతున్నారు. ఈ షెడ్యూల్ పూర్తి కాగానే సినిమా షూటింగ్ అంతా ముగుస్తుంది.
