యంగ్ అండ్ డైనమిక్ హీరో అఖిల్ అక్కినేని, స్టైలిష్ మేకర్ సురేందర్ రెడ్డిల క్రేజీ పాన్ ఇండియా ప్రాజెక్ట్ ‘ఏజెంట్’. ఈ చిత్రం ఏప్రిల్ 28న ప్రపంచవ్యాప్తంగా గ్రాండ్‌గా విడుదల కానుంది. ఈ నేపథ్యంలో ప్రమోషన్స్‌ లో బిజీగా ఉంది చిత్రయూనిట్. ఇప్పటికే విడుదలైన ట్రైలర్ థ్రిల్లింగ్, యాక్షన్, విజువల్ అంశాలతో అదిరిపోయింది. ఇక ఈ మూవీ ప్రమోషన్‌లో భాగంగా హీరో అఖిల్ తిరుపతిలోని ఓ ప్రైవేటు హోటల్‌లో ప్రెస్‌మీట్ నిర్వహించారు.
ఈ సందర్భంగా అఖిల్ కీలక వ్యాఖ్యలు చేశారు. ‘నేను అక్కినేని వారసుడిగా పని చేయను.. నేను అఖిల్‌గా ముందుకెళ్తా. అక్కినేని పేరు ఉంటే.. ఒకే తరహాలో సినిమాలు చేయాలి. వారసత్వం అనేది నాపై బర్డన్‌గా ఉంటుంది. ప్రజలు నన్ను అఖిల్‌గానే ఓన్ చేసుకోవాలి. దాని కోసమే నేను ప్రయత్నిస్తూ ఉన్నా. నేను నా సొంత నిర్ణయాలు తీసుకుంటున్నాను. సక్సెస్ లు వచ్చినా, ఫెయిల్యూర్ లు వచ్చినా చివరి దాకా నాలాగే ఉండేందుకు ప్రయత్నిస్తాను’ అని అఖిల్ అన్నారు. ప్రస్తుతం అఖిల్ చేసిన వ్యాఖ్యలు వైరల్ అవుతున్నాయి.
ఇకపోతే ఈ మూవీలో మలయాళ స్టార్ హీరో మమ్ముట్టి కీలక పాత్రలో నటిస్తున్నాడు. హీరోయిన్ గా సాక్షి వైద్య నటిస్తున్న ఈ మూవీలో డినో మోరియో మరో ప్రధాన పాత్రలో నటిస్తున్నారు. కాగా ఏకే ఎంటర్టైన్మెంట్స్, సురేందర్ 2 సినిమాస్ సంస్థలు కలిసి నిర్మిస్తున్న ఈ సినిమాకి హిప్ హాప్ తమిజా సంగీతం అందిస్తున్నారు.
