చిరంజీవి కథానాయకుడిగా కొరటాల శివ దర్శకత్వంలో తెరకెక్కుతున్న చిత్రం ‘ఆచార్య’. కాజల్‌ కథానాయికగా నటిస్తుండగా, రామ్‌చరణ్‌ కామ్రేడ్‌ సిద్ధ పాత్రలో కనిపించనున్నారు. ప్రస్తుతం పూజాహెగ్డే, రామ్‌చరణ్‌లపై ఓ పాటని మారేడుమిల్లిలో ప్రత్యేకంగా నిర్మించిన సెట్లో చిత్రీకరిస్తున్నారు.
ఈ పాటకి శేఖర్‌ మాస్టర్‌ నృత్యాలు సమకూరుస్తున్నారు. మూడు రోజుల పాటు అటవీ నేపథ్యంగా చిత్రీకరించే ఈ పాట కథనంలో చాలా కీలకమైనదని సమాచారం. ‘జిగేల్‌ రాణి’గా ‘రంగస్థలం’లో కుర్రకారును ఓ ఊపు ఊపేసింది పూజాహెగ్డే. చరణ్‌తో కలిసి ఆమె వేసిన స్టెప్‌లు విపరీతంగా అలరించాయి. మరోసారి వీరిద్దరూ కలిసి వెండితెరపై సందడి చేసేందుకు సిద్ధమవ్వడం ఫ్యాన్స్ కి కిక్ ఇస్తుంది.
