అతి తక్కువ సమయంలోనే అగ్ర బ్యానర్ గా గుర్తింపు పొందిన నిర్మాణ సంస్థ మైత్రి మూవీ మేకర్స్. శ్రీమంతుడు , జనతా గ్యారేజ్ , రంగస్థలం వంటి బ్లాక్ బస్టర్ హిట్లను అందించిన ఈ బ్యానర్ ప్రస్తుతం వరుస పెట్టి చిన్న , పెద్ద హీరోలతో సినిమాలు నిర్మిస్తుంది.
రీసెంట్‌గా ఈ సంస్థకు సంబంధించి ఓ వార్త సోషల్ మీడియాలో వైరల్ అవుతుంది. కార్తీతో ‘ఖైదీ’ అంటూ హిట్ కొట్టి, విజయ్‌ని ‘మాస్టర్’ని చేసిన లోకేష్ కనగరాజ్ తో ఓ సినిమా చేయబోతున్నట్లు వార్తలు షికార్లు చేస్తున్నాయి. మైత్రీ మూవీ మేకర్స్ బ్యానర్‌లో లోకేష్ కనగరాజ్ చేయబోయే చిత్రం మెగాపవర్ స్టార్ రామ్ చరణ్‌తో అని అంటున్నారు. ప్రస్తుతం రామ్ చరణ్ ‘ఆర్ఆర్ఆర్’, ‘ఆచార్య’ చిత్రాలతో బిజీగా ఉన్నారు. ఈలోపు లోకేష్ ‘ఖైదీ’ సీక్వెల్ పూర్తి చేయనున్నాడు. అనంతరం వీరిద్దరి కాంబినేషన్‌లో మైత్రీ మూవీ మేకర్స్‌లో చేయబోయే చిత్రం సెట్స్‌పైకి వెళ్లనుందని, దీని గురించి త్వరలో అధికారిక ప్రకటన కూడా రానుందని అంటున్నారు.
