రాజమౌళి దర్శకత్వంలో ఎన్టీఆర్‌-రామ్‌చరణ్‌లు కీలక పాత్రలు పోషిస్తున్న చిత్రం ‘ఆర్‌ఆర్‌ఆర్‌: రౌద్రం రణం రుధిరం’. ఇందులో రామ్‌చరణ్‌ అల్లూరి సీతారామరాజుగా కనిపించనున్నారు కొమరం భీంగా ఎన్టీఆర్‌ నటిస్తున్నారు. కొమరం భీం జీవితంలో ఆయన బాబాయ్‌ ప్రధాన పాత్ర పోషించారట. అందుకే ఆ పాత్ర కోసం మోహన్‌లాల్‌ను సంప్రదిస్తున్నట్లు సమాచారం.
మోహన్‌లాల్‌, ఎన్టీఆర్‌ కీలక పాత్రల్లో నటించిన ‘జనతా గ్యారేజ్‌’ బాక్సాఫీస్‌ వద్ద ఎంతటి ఘన విజయాన్ని సొంతం చేసుకుందో అందరికీ తెలిసిందే. మరోసారి వీరిద్దరూ కలిసి నటిస్తే అభిమానులకు పండగే. ఈ సినిమాలో రామ్‌చరణ్‌కు జంటగా బాలీవుడ్‌ నటి ఆలియాభట్‌, ఎన్టీఆర్‌కు జంటగా హాలీవుడ్‌ నటి ఒలీవియా మోరీస్‌ సందడి చేయనున్నారు.
