ఇండస్ట్రీ లో ఒకే రోజు రెండు విషాద ఛాయలు చోటు చేసుకోవడం ఇండస్ట్రీ ని షాక్ కు గురి చేసాయి. సోమవారం మధ్యాహ్నం రాజీవ్ కనకాల చెల్లెలు శ్రీ లక్ష్మి కనకాల మరణించగా.. కొద్దీ సేపటి క్రితం ప్ర‌ముఖ ద‌ర్శ‌కుడు, నిర్మాత తమ్మారెడ్డి భరద్వాజ మాతృమూర్తి కృష్ణ‌వేణి (94) మృతి చెందారు. గ‌త కొంత‌కాలంగా అనారోగ్యంతో బాధ‌ప‌డుతున్న ఆమె ఈరోజు తుది శ్వాస విడిచారు.
తమ్మారెడ్డి భరద్వాజ తండ్రి కృష్ణ‌మూర్తి కూడా చిత్ర నిర్మాతే. ఆయ‌న ర‌వీంద్ర ఆర్ట్స్ ప‌తాకంపై ల‌క్షాధికారి, జ‌మీందారు, బంగారు గాజులు, ధ‌ర్మ‌ధాత, ద‌త్త పుత్రుడు, డాక్ట‌ర్ బాబు త‌దిత‌ర అనేక విజయవంతమైన చిత్రాలు నిర్మించారు. ఈ దంపతుల‌కు ఇద్ద‌రు కుమారులు. పెద్ద కుమారుడు లెనిన్ బాబు కూడా చ‌నిపోయారు. చిన్న కుమారుడు భరద్వాజ నిర్మాత‌గా, ద‌ర్శ‌కుడిగా అనేక విజయవంతమైన చిత్రాలు అందించారు. మొద‌టి నుంచి వీరిది వామ‌ప‌క్ష భావాలున్న కుటుంబం.
మాతృమూర్తిని కోల్పోయిన తమ్మారెడ్డి భరద్వాజ మాట్లాడుతూ.. అనారోగ్యంతో త‌న తల్లి రెండు నెల‌లుగా ఇబ్బంది ప‌డుతున్నార‌ని తెలిపారు. త‌న మిత్రులు, శ్రేయోభిలాషులు చాలా మంది ఫోన్లు చేస్తున్నార‌ని, క‌రోనా తీవ్ర‌త ఎక్కువ‌గా ఉన్నందున త‌న‌ను ప‌రామ‌ర్శించ‌డానికి ఎవ‌రూ ఇంటికి రావ‌ద్ద‌ని ఆయ‌న కోరారు.
