వరుణ్‌ తేజ్‌ నటించిన ‘గద్దలకొండ గణేష్‌’ చిత్రం తాజాగా విడుదలయింది. ‘జిగర్తాండ’ తమిళ చిత్రానికి రీమేక్‌గా ఈ చిత్రం తెరకెక్కింది. హరీష్‌ శంకర్ ఉన్నది ఉన్నట్టుగా కాకుండా కొన్ని మార్పులు చేర్పులు చేసి తనదైన స్టయిల్‌లో ‘గద్దలకొండ గణేష్‌’ను తెరకెక్కించారు. ఈ చిత్రంలో పూజా హెగ్డే వరుణ్‌ సరసన రొమాన్స్‌ చేసింది. అలనాటి సూపర్‌హిట్‌ సాంగ్‌ వెల్లువచ్చే గోదారమ్మా… పాటను రీమిక్స్‌ చేయడంతో ఈ సినిమాకు ప్రత్యేక ఆకర్షణగా నిలిచింది. విడుదలయిన మొదటి రోజు నుండే ‘గద్దలకొండ గణేష్‌’కు పాజిటివ్‌ టాక్‌ వస్తోంది.
తొలి షో నుండి మంచి స్పందనను సొంతం చేసుకున్న ఈ చిత్రానికి కలెక్షన్లు కూడా ఆశించిన దానికంటే ఎక్కువగా వస్తున్నాయి. తొలివారాంతానికి 13.4 కోట్లను వసూలు చేసింది. వరుణ్‌ హిట్‌ చిత్రాలయిన ‘ఫిదా’, ‘తొలిప్రేమ’ కలెక్షన్ల కంటే ఇది చాలా ఎక్కువ. దాంతో వరుణ్‌ మాస్ లుక్‌కు కూడి భారీ స్పందన వచ్చిందని యూనిట్‌ సంతోషపడుతున్నారు. ఇక సోమవారం నుండి వచ్చే కలెక్షన్లు ఇది ఏ స్థాయి విజయం అనేది తెలియజేస్తాయి. ఇకపోతే ‘సైరా’ చిత్రం వరకు పెద్దగా పోటీ లేకపోవడంతో గద్దలకొండకు మంచి ప్లస్‌ అయ్యే అవకాశం ఉంది. మొత్తానికి ఈ చిత్రంతో వరుణ్‌ గత రికార్డులను బ్రేక్‌ చేసి కొత్త రికార్డును బుట్టలో వేసుకున్నాడు.
