టాలీవుడ్‌ జక్కన్న రాజమౌళి దర్శకత్వంలో తెరకెక్కుతున్న ‘ఆర్‌ఆర్‌ఆర్‌’ చిత్రం గురించి ప్రేక్షకుల్లో అంచనాలు ఎప్పటికప్పుడు పెరుగుతూనే ఉన్నాయి. బాహుబలి వంటి బ్లాక్‌ బస్టర్‌ చిత్రం తర్వాత రాజమౌళి చేస్తున్న సినిమా అవ్వడం, అలాగే ఇద్దరు స్టార్‌ హీరోలు ఈ చిత్రంలో నటించడం వల్ల అంచనాలు భారీగా ఉన్నాయి. ఇక ఈ చిత్రంలో అల్లూరి సీతారామరాజు పాత్రను చరణ్‌ పోషిస్తుండగా, ప్రముఖ స్వాతంత్య్ర సమరయోధుడు కొమురం భీం పాత్రను ఎన్టీఆర్‌ పోషిస్తున్నాడు.
స్వాతంత్య్ర ఉద్యమం నేపథ్యంలో తెరకెక్కుతున్న ఈ చిత్రంలో కమర్షియల్‌ ఎలిమెంట్స్‌కు తావు ఇవ్వకుండా జక్కన్న ఆకట్టుకునే కథ, కథనంతో సినిమాను తీయాలని భావిస్తున్నాడు. అందుకోసమే ఈ చిత్రంలో కేవలం మూడు పాటలను మాత్రమే పెట్టాలని భావిస్తున్నారు. ఆ మూడు పాటలు కూడా చాలా సహజంగా, కథలో భాగం అయ్యి రాబోతున్నాయి. రొమాంటిక్‌ సాంగ్స్‌ ఇంకా లవ్‌ సాంగ్స్‌ ఉండకుండానే ఈ చిత్రం ఉంటుందని అంటున్నారు. 400 కోట్ల బడ్జెట్‌తో దానయ్య నిర్మిస్తున్న ఈ చిత్రం వచ్చే ఏడాది జులై 30న ప్రేక్షకుల ముందుకు రాబోతుంది.
