టాలీవుడ్‌ జక్కన్న రాజమౌళి ప్రస్తుతం తన ‘ఆర్‌ఆర్‌ఆర్‌’ చిత్రంతో చాలా బిజీగా ఉన్నాడు. బల్గేరియాలో షూటింగ్‌ చేస్తున్న జక్కన్న మరి కొన్ని రోజుల్లో ఇండియా రాబోతున్నాడు. వచ్చిన వెంటనే జక్కన్న ముందు సైరా చిత్రంను ఉంచేందుకు ప్రయత్నాలు జరుగుతున్నట్లుగా సమాచారం అందుతోంది. సైరా ఫైనల్‌ వర్షన్‌ను రాజమౌళికి చూపించి ఆయన చెప్పిన విధంగా రీ ఎడిట్‌ చేయడం లేదంటే చిన్న చిన్న మార్పులు చేర్పులు చేయడం వంటివి చేయాలని మెగా కాంపౌండ్‌ భావిస్తోంది.
ప్రస్తుతం జక్కన్న తెరకెక్కిస్తున్న చిత్రంలో రామ్‌ చరణ్‌ ఒక హీరోగా నటిస్తున్నాడు. అదే రామ్‌ చరణ్‌ సైరాకు నిర్మాత. ఆ కారణంగానే సైరా చిత్రం కోసం జక్కన్న సమయం కేటాయిస్తాడని అంతా భావిస్తున్నారు. ప్రస్తుతం సినిమాకు సంబంధించిన పోస్ట్‌ ప్రొడక్షన్‌ వర్క్‌ జరుగుతోంది. భారీ ఎత్తున అంచనాలున్న ఈ చిత్రంకు సంబంధించిన చిన్న విషయంలో కూడా ఛాయిస్‌ తీసుకోవద్దనే ఉద్దేశ్యంతో ఈ నిర్ణయానికి వచ్చినట్లుగా సమాచారం అందుతోంది.
