యాంగ్రీ యంగ్‌మన్‌ రాజశేఖర్‌ చాలా ఏళ్ల తర్వాత ‘గరుడవేగ’ చిత్రంతో సక్సెస్‌ను దక్కించుకున్నాడు. ఆ సక్సెస్‌ జోరు కొన్ని రోజులు కూడా మిగలలేదు. కల్కి చిత్రంతో మరోసారి ఈయన సక్సెస్‌ను దక్కించుకోవాలని చాలా ప్రయత్నాలు చేశాడు. కాని కల్కీ చిత్రం తీవ్ర నిరాశపర్చింది. అలాంటి సినిమా ఎలా చేశాడు, ఎలా ఒప్పుకున్నాడు అంటూ విమర్శలు వచ్చాయి. హీరోగా రాజశేఖర్‌ సినిమా వద్దే వద్దు అంటూ కొందరు అభిప్రాయం వ్యక్తం చేస్తుంటే మరో సారి హీరోగా నటించేందుకు రాజశేఖర్‌ సిద్దం అయ్యాడు.
తమిళ దర్శకుడు ప్రదీప్‌ కృష్ణమూర్తి దర్శకత్వంలో రాజశేఖర్‌ హీరోగా ఒక చిత్రం తెరకెక్కబోతుంది. అందుకు సంబంధించిన ప్రకటన అధికారికంగా వచ్చింది. ఈయన తమిళంలో భేతాలుడు అనే విభిన్నమైన చిత్రాన్ని ప్రేక్షకుల ముందుకు తీసుకు వచ్చాడు. ఆ చిత్రం తెలుగులో అంతంత మాత్రంగానే ఆడినా తమిళంలో మాత్రం మంచి విజయాన్ని దక్కించుకుంది. ఇప్పుడు ఆయన రాజశేఖర్‌ చిత్రంతో తెలుగులో ఎంట్రీ ఇవ్వబోతున్నాడు. ఈ చిత్రంలో కీలక పాత్రలో బ్రహ్మానందం నటించబోతున్నాడు అంటూ చెప్పడంతో ఆసక్తి కలుగుతోంది. ఈమద్య కాలంలో బ్రహ్మానందం నటించడం చాలా అరుదు అయ్యింది. అందుకే ఈ చిత్రంలో నటించబోతున్న కారణంగా అంచనాలు ఉన్నాయి.
