ప్రభాస్‌ హీరోగా శ్రద్దా కపూర్‌ హీరోయిన్‌గా తెరకెక్కిన ‘సాహో’ చిత్రం ఆగస్టు 30వ తారీకున ప్రపంచ వ్యాప్తంగా భారీ అంచనాల నడుమ విడుదల కాబోతుంది. 350 కోట్ల బడ్జెట్‌ సినిమా అవ్వడంతో బాలీవుడ్‌ వర్గాలు కూడా చాలా ఆసక్తిగా ఈ చిత్రం వైపు చూస్తున్నాయి. కేవలం ఒకే ఒక్క చిత్రానికి దర్శకత్వం వహించిన రన్‌ రాజా రన్‌ దర్శకుడు సుజీత్‌ ఈ చిత్రంను తెరకెక్కించాడు. ఇప్పుడు ఈ చిత్రంతో ఆయన కాస్త టెన్షన్‌ను ఎదుర్కొంటున్నట్లుగా తాజాగా ఇంటర్వ్యూలో పేర్కొన్నాడు. ఎక్కువ శాతం మంది సాహో సినిమాను బాహుబలితో పోల్చి చూస్తున్నారు. ఆ పోలికకు భయం వేస్తుందని సుజీత్‌ అంటున్నాడు.
బాహుబలి సినిమాతో పోల్చి సాహో సినిమాను చూస్తే ప్రేక్షకులు నిరాశ చెందే అవకాశం ఉంది. ఆ సినిమాకు ఈ సినిమాకు అస్సలు పోలిక ఉండదు కనుక రెండింటిని పోల్చి చూసి సాహోను చూడటం కరెక్ట్‌ కాదని ఆయన అభిప్రాయం వ్యక్తం చేస్తున్నాడు. బాహుబలి సినిమా ఎలా అయితే ప్రేక్షకులను ఎంటర్‌టైన్‌ చేసిందో సాహో కూడ అదే స్థాయిలో ఎంటర్‌టైన్‌ అయితే చేస్తుంది. కాని పూర్తి విభిన్నమైన రీతిలో ఎంటర్‌టైన్‌ చేస్తుందని సుజీత్‌ పేర్కొన్నాడు. సాహోలోని యాక్షన్‌ ఎపిసోడ్స్‌ హాలీవుడ్‌ స్టైల్‌లో ఉంటాయని అన్నాడు. మరి కొన్ని రోజుల్లో ప్రేక్షకుల ముందుకు రాబోతున్న సాహో చిత్రం ఎలాంటి ఫలితాన్ని దక్కించుకుంటుందో చూడాలి.
