జల విలయంతో అతలాకుతలమైన కేరళకు సినిమా ఇండస్ట్రీస్, క్రీడా రంగాలకు చెందిన పలువురు ప్రముఖులు కేరళ వరద బాధితుల పట్ల తమ దాతృత్వాన్ని చాటుకున్నారు. తాజాగా ఆ జాబితాలో విరుష్క దంపతులు కూడా చేరిపోయారు. ఇంగ్లండ్‌లో ఆ దేశం జట్టుతో జరుగుతున్న టెస్ట్ సిరీస్ కోసం అక్కడే ఉన్న భారత క్రికెట్ జట్టు కెప్టెన్ విరాట్ కోహ్లీ, ఆయన భార్య, బాలీవుడ్ నటి అనుష్క శర్మ ఇండియాలో ఉన్న తమ సిబ్బందితో ఎప్పటికప్పుడు టచ్‌లో ఉంటూ కేరళలోని సహాయ కార్యక్రమాలను పర్యవేక్షిస్తున్నట్టు సమాచారం.
అయితే విరుష్క దంపతులు కేరళ వరద బాధితుల కోసం కేరళ ముఖ్యమంత్రి సహాయ నిధికి విరాళాన్ని పంపించినట్టు తెలుస్తోంది. వారు ఎంత మొత్తంలో చెక్కు ఇచ్చారు అనే వివరాలు మాత్రం బయటకి రాలేదు. కేరళ బాధితుల గురించే కాకుండా వరదల బారినపడి, అల్లాడుతున్న నోరు లేని మూగజీవాల కోసం సైతం విరుష్క దంపతులు ఆలోచించి, వరద బాధితులకు సహాయక సామాగ్రితోపాటు ఆహారం లేక విలవిల్లాడుతున్న మూగ జీవాల కోసం ఓ ట్రక్కు నిండా ఆహార వస్తువులు, ఔషధాలు పంపినట్టు మీడియాలో వార్తలు వస్తున్నాయి.
ఇంగ్లండ్‌తో జరిగిన మూడో టెస్టులో సాధించిన విజయాన్ని కేరళ బాధితుల కోసం అంకితం చేస్తున్నట్టు ప్రకటించిన విరాట్ కోహ్లీ, ఆ మ్యాచ్ విజయం ద్వారా రూ.1.26 కోట్ల ప్రైజ్ మనీని కేరళ వరద బాధితులకు విరాళంగా జట్టు మొత్తం తరుపున ఇస్తున్నట్లు చెప్పాడు.
