తెలుగు రాష్ట్రం ఏపీ మరియు తెలంగాణగా విడిపోయాక టీడీపీ మరియు వైకాపాలు కేవలం ఏపీకి మాత్రమే పరిమితం అయ్యాయి. తెలంగాణలో టీడీపీని బలోపేతం చేయాలని చంద్రబాబు నాయుడు రెండు సంవత్సరాలు ప్రయత్నించాడు. కాని అది సాధ్యం కాకపోవడంతో వదిలేశాడు. తెలంగాణలో టీడీపీకి పెద్ద దిక్కు లేకపోవడంతో పార్టీ గాలికి కొట్టుకు పోతున్న గాలిపటం మాదిరిగా అయ్యింది. ఇప్పటికే టీటీడీపీలో నాయకులు అంతా ఇతర పార్టీల్లోకి వెళ్లి పోయారు. 2019 ఎన్నికల్లో కనీసం ఒక్కటి రెండు అసెంబ్లీ స్థానాలు కూడా సాధించలేని పరిస్థితుల్లో ఉంది.
ఇక వైకాపా పరిస్థితి మరింత దారుణంగా ఉంది. ఇప్పటికే వైకాపాకు తెలంగాణలో స్థానం లేకుండా పోయింది. ఏపీలో అధికారం దక్కించుకోవాలి అంటే తెలంగాణలో పార్టీని వదిలేసుకోవాల్సిందే అని జగన్‌ భావించాడు. అందుకే తెలంగాణలో పార్టీ బలోపేతంకు ఆయన ప్రయత్నాలు చేయలేదు. ఏపీ మరియు తెలంగాణలో ప్రాంతీయ పార్టీలు కొనసాగాలి అంటే సాధ్యం కాదని టీడీపీ, వైకాపాలతో తేలిపోయింది. కాని జనసేన పార్టీని మాత్రం రెండు రాష్ట్రాల్లో బలోపేతం చేసేందుకు పవన్‌ ప్రయత్నాలు చేస్తున్నాడు.
ఏపీకే పరిమితం అవుతాడని భావించిన పవన్‌ తెలంగాణ నుండి తన రాజకీయ యాత్రను ప్రారంభించడం, దాంతో పాటు రెండు రాష్ట్రాల్లో పోటీ చేస్తాను అంటూ ప్రకటించడంతో అంతా షాక్‌ అవుతున్నారు. చంద్రబాబు నాయుడు, జగన్‌లకు రెండు రాష్ట్రాల్లో పార్టీని నడపడం సాధ్యం కాలేదు. అలాంటిది పవన్‌కు అది సాధ్యం అయ్యేనా అంటూ రాజకీయ విశ్లేషకులు సైతం ఆలోచనలో పడ్డారు. చూద్దాం భవిష్యత్తులో పవన్‌ జనసేన తెలుగు రాష్ట్రాల్లో ఎలాంటి ప్రభావంను చూపుతుందో..!
