తక్కువ కాలంలోనే స్టార్‌ హీరోల సరసన నటించే అవకాశాలను సొంతం చేసుకుని వరుస విజయాలను తన బుట్టలో వేసుకుని స్టార్‌ హీరోయిన్‌గా యమ బిజీ అయ్యింది ముద్దుగుమ్మ రకుల్‌ ప్రీత్‌ సింగ్‌. ఈ అమ్మడు అక్కినేని యువహీరో నాగచైతన్యతో కలిసి కళ్యాణకృష్ణ దర్శకత్వంలో ‘రారండోయ్‌ వేడుకచూద్దాం’ చిత్రంలో నటించింది. ఈ చిత్రం ఈ నెల 26న ప్రేక్షకుల ముందుకు రావడానికి ముస్తాబవుతోంది. ఇటీవలె విడుదలయిన టీజర్‌కు మంచి స్పందన వచ్చింది. కుటుంబ కథా చిత్రంగా అంచనాలను పెంచేసింది.
ఈ చిత్ర ప్రమోషన్‌ కార్యక్రమాలను చిత్ర యూనిట్‌ ఇప్పటికే షురూ చేసింది. తాజాగా ఈ చిత్రం గురించి ముద్దుగుమ్మ రకుల్‌ చెప్పుకొచ్చింది. ఈ చిత్రంలో తాను భ్రమారాంభ పాత్రలో నటించానని, ఈ పాత్ర తనకు బాగా నచ్చిందని, కథ విన్నప్పుడే తన పాత్రపై మనస్సు పారేసుకున్నానని, అందుకే డేట్స్‌ లేకున్నా కూడా ఈ మంచి చిత్రాన్ని మిస్‌ చేసుకోవద్దు అనే ఉద్దేశ్యంతో సర్దేశానని, ప్రేక్షకులకు కూడా ఈ పాత్ర చాలా బాగా నచ్చుతుంది అని చెప్పుకొచ్చింది. విడుదలకు ముందు అంతా ఇలాగే ఈ పాత్ర చాలా ఇష్టం అని చెబుతారు ఆ తర్వాత ఊసే ఎత్తరు. రకుల్‌ కూడా ప్రమోషన్‌ కోసం తన పాత్ర గురించి అలా చెబుతుందా..? లేదా రకుల్‌కు నిజంగా ఈ పాత్ర అంటే ఇష్టమా అని సినిమా విడుదలయ్యాక చూడాలి.
