అందాలతార సమంత ప్రేమ వ్యవహారం బయట పడ్డాక కొన్నాళ్లు కాస్త ఖాళీగా ఉండి ఆ తర్వాత యమ బిజీ అవుతోంది. ఈ ఏడాది చివరికెళ్లా అక్కినేని యువ హీరో నాగచైతన్యతతో ఈ అమ్మడికి పెళ్లి జరగాల్సి ఉంది. కానీ సమంత మాత్రం ప్రస్తుతానికి పెళ్లి విషయాన్ని మరిచిందేమో కానీ వరుస చిత్రాల్లో నటించడానికి ప్లాన్‌ చేసుకుంటుంది.
సమంత ముందు ప్రస్తుతానికి మూడు పెద్ద ప్రాజెక్ట్‌లు ఉన్నాయి. మెగాపవర్‌స్టార్‌ రామ్‌చరణ్‌ మరియు సుకుమార్‌ కాంభోలో తెరకెక్కనున్న చిత్రంలో సమంత హీరోయిన్‌గా నటించనుంది. అంతేకాకుండా తన మామ నాగార్జున నటిస్తున్న ‘రాజుగారి గది’ చిత్ర సీక్వెల్‌లో కూడా ఒక ముఖ్య పాత్రలో నటిస్తోంది. దీంతో పాటు ప్రతిష్టాత్మకంగా తెరకెక్కనున్న ‘మాహానటి’ సావిత్రి బయోపిక్‌లో కూడా సమంత నటించడానికి రెడీ అయ్యింది.
రామ్‌చరణ్‌, సుకుమార్‌ల కాంభోలో తెరకెక్కే చిత్రంలో చెర్రీ చెవిటి వాడిగా నటించనున్నాడని, సమంత మూగ అమ్మాయిగా నటించనుందని తాజాగా ఫిల్మ్‌ నగర్‌లో వార్త చక్కర్లు కొడుతుంది. 80 నేపథ్యంలో సాగే కథలో సమంత మూగ పిల్లగా నటించనుందనగానే అభిమానులు కాస్త ఆందోళన చెందారు.
అందాలతార సమంత మూగ పిల్లగానా..?? అబ్బో అంటూ నిరాశ పడ్డారు. దాంతో ఈ విషయమై చిత్ర యూనిట్‌ వెంటనే స్పందించింది. ఈ చిత్రంలో సమంత మూగ పాత్రలో నటించడం లేదు అంటూ నిర్మాత క్లారిటీ ఇచ్చాడు. సమంతది మూగ పాత్ర కాదు అని క్లారిటీ ఇచ్చిన నిర్మాత చరణ్‌ చెవిటి పాత్రపై మాత్రం స్పందించలేదు. దాంతో చరణ్‌ది చెవిటి పాత్ర ఫిక్స్‌ అని అంతా అనుకుంటున్నారు.
