సూపర్‌స్టార్‌ మహేష్‌ బాబు ప్రస్తుతం క్రేజీ దర్శకుడు మురుగదాస్‌ దర్శకత్వంలో నటిస్తున్నాడు. ఈ చిత్ర షూటింగ్‌ దాదాపు పూర్తి కావొచ్చింది. చాలా రోజుల నుండి షూటింగ్‌ జరుపుకుంటున్న ఈ చిత్ర టైటిల్‌ను కూడా ఇంకా ఖరారు చేయలేదు. టైటిల్‌ బరిలో చాలా పేర్లే వినిపించాయి. కానీ చిత్ర యూనిట్‌ నుండి అధికారిక ప్రకటన ఇంతవరకు రాలేదు. టైటిల్‌ వల్లనే ఈ చిత్ర ఫస్ట్‌లుక్‌ కూడా రాలేదు. జూన్‌లో ఈ చిత్రాన్ని విడుద చేస్తామని చిత్ర యూనిట్‌ ఇప్పటికే అధికారికంగా ప్రకటించారు. తాజాగా ఫస్ట్‌లుక్‌ కూడా త్వరలో రాబోతుంది అనే వార్తలు వినిపిస్తున్నాయి.
వాస్తవానికి మహేష్‌ ఫస్ట్‌లుక్‌ ఎప్పుడో రావాల్సి ఉంది కానీ టైటిల్‌ ఖరారు కాకపోవడం వల్ల చాలాసార్లు అభిమానుల ఆశలపై నీళ్లు చల్లుతూనే వస్తున్నారు. ఇక ఉగాది పర్వదినాన్ని పురస్కరించుకుని ఈ చిత్ర టైటిల్‌తో పాటే ఫస్ట్‌లుక్‌ కూడా విడుదల కానుంది అని టాక్‌ వినిపిస్తోంది. ఈ చిత్రానికి ‘స్పైడర్‌’ అనే టైటిల్‌ను ఫిక్స్‌ చేసే ఆలోచనలో ఉన్నారని తెలుస్తోంది.
ఇప్పటికే చాలాసార్లు ఇదిగో ఫస్ట్‌లుక్‌, అదిగో ఫస్ట్‌లుక్‌ అని వార్తలు వచ్చాయి. మరి ఈ సారి అయిన ఉగాది పండుగ రోజున కచ్చితంగా విడుదలవుతుందా అనే అనుమానాలు వ్యక్తం అవుతున్నాయి. ఆ తర్వాత వెంటనే ఆడియో వేడుకను కూడా జరుపుతారట. ఈ చిత్రంలో మహేష్‌ సరసన రకుల్‌ ప్రీత్‌ సింగ్‌ రొమాన్స్‌ చేస్తోంది.
