వివాదాల దర్శకుడు రామ్‌గోపాల్‌ వర్మ తాజాగా విడుదలయిన ‘బాహుబలి 2’ ట్రైలర్‌ను ప్రశంసలతో ముంచెత్తాడు. అంతేకాకుండా టాలీవుడ్‌లో ఉండే అగ్ర హీరోలపై కూడా ఘాటు వ్యాఖ్యలు చేస్తున్నాడు. దేశ వ్యాప్తంగా ప్రభాస్‌ను ముంచెత్తుతుంటే టాలీవుడ్‌ స్టార్స్‌ మాత్రం కుళ్లుతోనే ‘బాహుబలి’ని పట్టించుకోవడం లేదు అని ట్వీట్‌ చేశాడు. అంతేకాకుండా ‘బాహుబలి’ సినిమాలకు అమ్మ కాదు అమ్మమ్మ వంటిది అని ఆకాశానికి ఎత్తేశాడు.
స్టార్‌ హీరోలందరు ప్రభాస్‌ కాలి గోటిని తాకాలంటే రెండు జన్మలెత్తాలి అని ట్రైలర్‌ 24గంటల్లో 5 మిలియన్‌ల వ్యూస్‌ను సొంతం చేసుకున్న నేపథ్యంలో ట్వీట్‌ చేశాడు. ఆ తర్వాత ప్రభాస్‌ ‘బాహుబలి’ ఫిగర్‌ను చూసి టాలీవుడ్‌ స్టార్స్‌ ఆత్మహత్యలకు పాల్పడతారేమో అని భయంగా ఉందని సంచలన ట్వీట్‌ చేశాడు. అయితే గతంలో వర్మ మెగాస్టార్‌ చిరంజీవికి క్షమాపణలు చెబుతూ తెలుగులో ట్వీట్‌ చేశాడు. ఆ తర్వాత కాసేపటి క్రితమే ఎవరో ఇడియట్‌ నా ట్విట్టర్‌ని హ్యాక్‌ చేశాడు అంటూ మాట మార్చాడు.
మరి ఈ సారి కూడా ‘బాహుబలి’ ఎత్తినప్పుడు తెలుగులోనే ట్వీట్‌ చేశాడు. గతంలో తాను తెలుగులో ట్వీట్‌ చేయను అంటూ కవర్‌ చేసుకున్నాడు. ట్రైలర్‌ విషయంలో కూడా తెలుగు ట్వీట్లే ఉన్నాయి. మరీ ఈ సారి కూడా అరెరే… తెలుగులో ట్వీట్లు నేను చేయలేదు, ట్విట్టర్‌ హ్యాక్‌ అయ్యింది అని చేతులు దులుపుకుంటాడా..? అనేది సందేహంగా మారింది. వర్మ మీద తెలుగు ఈగ్ర హీరోలు చాలా కోపంతో రగిలిపోతున్నారు. మరి మాట మారిస్తే మార్చుతాడు కూడా.
