టాలీవుడ్‌ జక్కన్న రాజమౌళి తెరకెక్కించిన ‘బాహుబలి 2’ చిత్రం ట్రైలర్‌ నేడు ఉదయం విడుదలైన విషయం తెల్సిందే. భారీ అంచనాలున్న ఈ సినిమా ట్రైలర్‌ అదే స్థాయిలో ఉంది. మొదటి పార్ట్‌ను మించి రెండవ పార్ట్‌ చిత్రం ఉంటుందని చెప్పకనే చెబుతుంది ఈ ట్రైలర్‌. ఇక ఈ ట్రైలర్‌లో బాహుబలిగా ప్రభాస్‌ అద్బుతం అంటూ వివాదాల దర్శకుడు రామ్‌ గోపాల్‌ వర్మ చెప్పుకొచ్చాడు. పది వేల మంది అమ్మాయిల కంటే కూడా అధికంగా ప్రభాస్‌ గ్లామర్‌గా కనిపించాడని ఈ సందర్బంగా వర్మ పేర్కొన్నాడు.
ఇంకా వర్మ ఈ ట్రైలర్‌పై పలు ఆసక్తికర వ్యాఖ్యలు చేశాడు. అదే విధంగా ప్రభాస్‌ గురించి కూడా ప్రత్యేకంగా వర్మ ట్వీట్స్‌ చేశాడు. ‘బాహుబలి 2’ చిత్రం తర్వాత ముంబయికి చెందిన ప్రముఖ అయిదు ప్రొడక్షన్‌ కంపెనీలు ప్రభాస్‌ డేట్స్‌ కోసం ఒకరితో ఒకరు దెబ్బలాడుకోవడం ఖాయం అంటూ వర్మ ట్వీట్‌ చేశాడు. ఈ చిత్రం తర్వాత టాలీవుడ్‌లో ప్రభాస్‌ మెగా సూపర్‌ స్టార్‌గా నివడం ఖాయం అని కూడా వర్మ అన్నాడు. బాహుబలి గురించి ప్రపంచం అంతా మాట్లాడుకుంటున్నా కూడా టాలీవుడ్‌ స్టార్స్‌ మాత్రం పెద్దగా స్పందించక పోవడానికి కారణం కుళ్లు అని, ఆ కుళ్లు అనే సముద్రంలో వారు మునిగి ఉన్నారని వర్మ టాలీవుడ్‌ స్టార్‌ హీరోలపై విమర్శలు గుప్పించాడు.
