డాషింగ్‌ డైరెక్టర్‌ పూరి జగన్నాద్‌ తాజాగా తెరకెక్కించిన చిత్రం ‘రోగ్‌’. ఈ చిత్రాన్ని కన్నడంతో పాటు తెలుగులో పూరి జగన్నాధ్‌ తెరకెక్కించాడు. ఈ చిత్రంలో ఇషాన్‌ హీరోగా పరిచయం అవుతుండగా, మన్నార చోప్రా హీరోయిన్‌గా నటించిన విషయం తెల్సిందే. భారీ అంచనాలున్న ఈ సినిమా ట్రైలర్‌ ఇటీవలే ప్రేక్షకుల ముందుకు వచ్చింది. తెలుగు ప్రేక్షకులను విపరీతంగా ఆకట్టున్న ట్రైలర్‌ సినిమాపై అంచనాలను భారీగా పెంచింది. ఇక ఈ సినిమా కన్నడ వర్షన్‌ ఆడియోను రేపు బెంగళూరులో స్టార్స్‌ సమక్షంలో విడుదల చేసేందుకు ఏర్పాట్లు జరుగుతున్నాయి.
కన్నడ సూపర్‌ స్టార్స్‌ అయిన సుదీప్‌, పునీత్‌ రాజ్‌ కుమార్‌, శివరాజ్‌ కుమార్‌లు ఆడియో వేడుకలో పాల్గొనబోతున్నారు. ఈ చిత్రంతో హీరోగా పరిచయం కాబోతున్న ఇషాన్‌కు మంచి బ్యాక్‌ గ్రౌండ్‌ ఉండటం వల్ల ఈ చిత్రం ఆడియోకు ఎంతో మంది సెలబ్రెటీలు రాబోతున్నారు. ఇక ఈ ఆడియో వేడుకకు బాలీవుడ్‌ స్టార్‌, మాజీ పోర్న్‌ స్టార్‌ అయిన సన్నీలియోన్‌ను కూడా ఆహ్వానించారు. ఆడియో వేడుక వేదికపై ఆమెతో డాన్స్‌ను వేయించేందుకు ప్రయత్నాలు జరుగుతున్నాయి. సన్నీలియోన్‌ ఆడియో వేడుకలో చూపించి మరింత క్రేజ్‌ను కొట్టేయాలని ప్రయత్నాలు చేస్తున్నట్లుగా తెలుస్తోంది. ఇక త్వరలోనే తెలుగులో కూడా ఈ చిత్ర ఆడియోను విడుదల చేయబోతున్నారు. కన్నడ మరియు తెలుగులో ఒకే సారి విడుదల చేయాలని పూరి భావిస్తున్నాడు.
