మాటల మాంత్రికుడు త్రివిక్రమ్‌ శ్రీనివాస్‌ దర్శకత్వంలో నితిన్‌ హీరోగా తెరకెక్కిన ‘అఆ’ చిత్రం మంచి విజయాన్ని సొంతం చేసుకుంది. ఆ సినిమా సక్సెస్‌ అయినా కూడా ఇప్పటి వరకు త్రివిక్రమ్‌ తన తర్వాత సినిమాను సెట్స్‌ పైకి తీసుకు వెళ్లలేదు. చాలా రోజుల క్రితమే పవన్‌ కళ్యాణ్‌తో సినిమాను కమిట్‌ అయిన త్రివిక్రమ్‌ ప్రస్తుతం పవన్‌ డేట్స్‌ కోసం ఎదురు చూస్తున్నాడు. పవన్‌తో సినిమా కోసం స్క్రిప్ట్‌ రెడీ చేసి పెట్టుకున్న త్రివిక్రమ్‌ తర్వాత సినిమా ఏంటి అనే విషయమై చర్చ జరుగుతుంది.
సుబ్బిరామిరెడ్డి మెగా బ్రదర్స్‌తో మల్టీస్టారర్‌ చేస్తానని, అందుకు త్రివిక్రమ్‌ స్క్రిప్ట్‌ను రెడీ చేస్తున్నాడు అంటూ చెప్పుకొచ్చాడు. అయితే ఇప్పటి వరకు త్రివిక్రమ్‌ ఆ విషయమై స్పందించినది లేదు. తాజాగా త్రివిక్రమ్‌కు అత్యంత సన్నిహితులైన వారి నుండి అందుతున్న సమాచారం ప్రకారం పవన్‌తో సినిమా పూర్తి అయిన తర్వాత అక్కినేని హీరో నాగచైతన్యతో ఒక సినిమాను చేసే ఆలోచనల్లో త్రివిక్రమ్‌ ఉన్నట్లుగా తెలుస్తోంది.
‘అఆ’ సమయంలోనే చైతూతో ఒక సినిమా చేయాల్సి ఉంది. కాని కొన్ని కారణాల వల్ల నితిన్‌తో ఆ సినిమా చేయడం జరిగింది. అప్పుడు మిస్‌ అయిన సినిమాను వచ్చే సంవత్సరం పట్టాలెక్కించాలని త్రివిక్రమ్‌ భావిస్తున్నట్లుగా తెలుస్తోంది. చైతూ కెరీర్‌లోనే త్రివిక్రమ్‌ దర్శకత్వంలో చేయబోతున్న సినిమా బిగ్‌ సక్సెస్‌గా నిలవడం ఖాయం అని ఇప్పటి నుండే అక్కినేని ఫ్యాన్స్‌ అంటున్నారు.
